18. 1. 2016: ОСРС робить на леґіслатівнім замірї. Підпорує єпіскопа про Русинів
В суботу 16-го януара 2015 р. проходило в Пряшові 17-те засїданя Округлого стола Русинів Словеньска (ОСРС).
В рамках проґраму была прочітана і офіціална позіція Ґрекокатолицькой архієпархії в Пряшові о можливостях зряджіня русиньской єпархії на теріторії Словакії з погляду Кодексу канонів выходных церьквей – канонічного права выходных католицькых церьквей. Як ся у выголошіню архієпіскопства, котре про ОСРС написав Любомір Петрик, пише, із погляду Кодексу канонів выходных церьквей не є можливе у выходных католицькых церьквах вытворїня персоналной єпархії ці екзархату, і вшыткы церьковны єдиніцї суть творены лем теріторіялно. Зато не є можне ани вытворїіня такой єпархії, котра бы была лем про Русинів, кідьже Русины на Словакії не жыють на неперерываній теріторії. Із той причіны ОСРС буде підтримовати рїшіня вопросу Русинів ґрекокатолицького віросповіданя способом выменованя єпіскопа-помічника в сучасній Пряшівскій архієпархії, котрый бы мав на старости і душпастырьство Русинів.
Мілан Піліп інформовав о конференції ку приготовленій пропозіції народностного закона, на котрій робив ОСРС під веджінём ґаранта Андрія Ліґы. Конференція проходила в Братїславі і были на ній участны і представителї далшых народностных меншын. По конзултаціях з далшыма меншынами ОСРС внесе пожадавкы тых меншын до приготовленой пропозіції. Так само є подля фаховцїв на леґіслатіву найперше потребне вытворїня леґіслатівного заміру закона, кідьже ОСРС має лем параґрафову верзію закона. Выроїблїнём леґіслатівного заміру, де буде обще пописане то, што вшытко бы мав закон рїшыти, ОСРС повірив Владиміра Мінчіча, правника і высокошкольского педаґоґа, котрый вже має скушености із леґіслатівным процесом на Словакії. Мінчіч буде так само кандідовати в доповнюючій вольбі до Выбору про народностны меншыны і етнічны ґрупы на місце заступника члена за русиньску народностну меншыну. Місце заступника зістало вольне по тім, што ся Мілан Піліп став рядным членом выбору по абдікації Мілана Мнягончака. У выборї є рядным членом за Русинів іщі Ян Ліпіньскый і застуником Петро Медвідь.
До кінця януара мають членове ОСРС передкладати свої пропозіції пріоріт про підпору русиньской културы на 2016 р. О тых пріорітах ся буде голосовати „per rollam“ в місяцї фебруар. Резултаты голосованя будуть передложены як рекомендація дотачній комісії Уряду влады Словацькой републікы. ОСРС буде рекомендовати дотачній комісії, жебы підпоровала такы фестівалы і події, котры жадають підпору із русиньскых грошей, де є найвекша кількость проґраму присвячена презентованю русиньской културы.
На найблизшім засїданю ОСРС собі русиньска платформа знова по роцї буде выберати нову презідію.
П. М.
